Të martë kuvendi i Shqipërisë do të mblidhet në një seancë plenare për herë të parë pas zgjedhjeve të 25 Prillit. Megjithëse qytetarët shprehën preferencat e tyre për deputetët që do t’i përfaqësojnë në kuvend, deri në datën 11 shtator do të vijojnë të qëndrojnë në parlament po të njëjtët deputetë. Nga data 11 shtator dhe në vijim do të ulen në karriget parlamentare deputetët e sapozgjedhur nga qytetarët. Janë në total 64 deputetë të cilët do të ulen për herë të parë në karriget parlamentare për të shprehur dhe përfaqësuar vullnetin e qytetarëve. Janë 37 deputetë në rradhët e partisë socialiste, të cilët numërojnë seancat e fundit në parlament, ndër të cilët edhe emra të njohur të arenës politike si Pandeli Majko, Mimi Kodheli, Ilir Beqaj, Vasilika Hysi, Eglantina Gjermeni. Ndërkohë shumica e deputetëve të opozitës të cilët nuk i dogjën mandatet dhe kundërshtuan vendimin e Partisë Demokratike dhe Lëvizjes Socialiste për Integrim nuk janë rizgjedhur ose nuk kandiduan në zgjedhjet e 25 Prillit. Rendi i ditës i 4 majit, parashikon disa akte normative për buxhetin e vitit 2021, për marrëveshjen me kompaninë turke që sjell vaksinën kineze në Shqipëri, për marrëveshjen me kompaninë Pfizer si dhe akti normativ për vaksinën Sputnik.