Policia ka vënë në pranga bashkëpunëtorin 36-vjeçar Alfred Hoxha të shpallur në kërkim, për vjedhjen e një shumë parash dhe bizhuterish, në një banesë, duke përdorur kopje të çelësit të derës. 36-vjeçari, banues në Durrës, ishte shpallur në kërkim më 14 shtator 2024, për një vjedhje në një banesë në lagjen nr.18, Durrës. Policia njofton se për këtë rast, në shtator, janë arrestuar një shtetase 33-vjeçare, e cila ishte e punësuar si sanitare në këtë banesë, e cila dyshohet se ka siguruar kopje të çelësit të derës dhe ua ka dhënë 42-vjeçarit, edhe ky i arrestuar në shtator të 2024 dhe 36-vjeçarit (vëllezër), të cilët dyshohet se më pas kanë kryer vjedhjen. Gjithashtu, në shtator, shërbimet e Policisë kanë gjetur në banesën e 42-vjeçarit dhe kanë sekuestruar në cilësinë e provës materiale, një varëse dhe një unazë floriri, një shumë parash dhe një automjet që dyshohet se është përdorur gjatë kryerjes së vjedhjes.