Sali Berisha dhe Ervin Salianji u ulën në tryezë të përbashkët në mbledhjen e kryesisë; pas takimeve paralele me bazën demokrate dhe distancimit të kryedemokratit nga takimet e Salianjit, të cilat i konsideron agjendë personale. Ish deputeti Ervin Salianji deklaroi se përballja me qeverinë, protestat dhe revolta duhet të jenë në qëndër të vendimmarrjes dhe aksionit opozitar. Kjo kërkesë u plotësua nga Berisha. “Është momenti që të fokusohemi tek protesta, tek revolta, përballja me qeverinë, te dëgjesa e çdo shqetësimi qytetar. Nëse nuk jemi të aftë t’i përkthejmë në energji shqetësimet e demokratëve, do ta kemi të vështirë siç po e kemi për të bërë protesta. Rruga e duhur janë revoltat, jo foltoret para Kryeministrisë. Shpresoj që kjo të jetë vendimmarrja e kryesisë i kam thënë në çdo mbledhje e do i them sërish. Kam qenë në çdo protestë dhe i jam nënshtruar vendimmarrjes së parties.”