Ish-deputeti demokrat Ervin Salianji përmes një letre nga burgu I Fierit, u është drejtuar me një mesazh të tijëve, ndërsa zgjedhjet po afrojnë. Sipas deputetit demokrat, qeveria po shkon drejt zgjedhjeve parlamentare të 11 Majit “e ngrysur dhe pa humor”. Salianji shprehet se qeveria po punon për patronazhimin e votës edhe në diasporë. “Shpallja nga Ministria e Brendshme se janë mbi 3.7 milionë votues për zgjedhjet e ardhshme dhe nisja e punës me listën që zyrtarisht do të afishohet në mars, pas regjistrimit të emigrantëve apo ankesave të ndryshme, është si të thuash nisja dhe nga ana zyrtare dhe burokratike e fushatës”, shkruan ish-deputeti demokrat në postim. Salianji shprehet se qeveria është pa ide dhe pa vizion në këto zgjedhje, dhe se nuk ka asgjë tjetër për të thënë përveç “suksesit” me turizmin, kodrat, malet apo luginat në Shqipëri, me të cilin sipas tij po përpiqet të mbulojë lidhjet me bandat dhe trafikantët ndërkombëtar të drogës.