Kancelari gjerman, Friedrich Merz, shprehu të enjten gatishmërinë për të forcuar marrëdhëniet me Shtetet e Bashkuara, gjatë një takimi me presidentin amerikan, Donald Trump, në Shtëpinë e Bardhë. “Na bashkon shumë nga historia jonë. U jemi thellësisht mirënjohës amerikanëve dhe nuk do ta harrojmë kurrë këtë,” deklaroi Merz në një prononcim për mediat nga Zyra Ovale. Trump, nga ana e tij, e cilësoi Merzin si një “burrë shumë të respektuar” dhe shprehu bindjen se SHBA dhe Gjermania do të kenë marrëdhënie të shkëlqyera. Ai konfirmoi se trupat amerikane do të mbeten të stacionuara në Gjermani dhe përshëndeti faktin që Berlini po rrit shpenzimet për mbrojtje. Gjatë takimit, Merz i kërkoi Trumpit të ushtrojë më shumë presion ndaj Rusisë për t’i dhënë fund luftës në Ukrainë, e cila tashmë ka hyrë në vitin e tretë. “Ne qëndrojmë krah Ukrainës dhe shpresojmë në më shumë presion ndërkombëtar ndaj Rusisë,” u shpreh Merz. Gjermania është përkrahësja e dytë më e madhe e Ukrainës, pas SHBA-së, në ndihmën ushtarake dhe financiare kundër pushtimit rus.