Kremlini tha të mërkurën se Rusia do të mbrojë anijet e saj në Detin Baltik me të gjitha mjetet në dispozicion dhe se një përpjekje e dështuar estoneze për të sekuestruar një cisternë atje tregoi së fundmi se Moska mund të përgjigjet me veprime të ashpra nëse do të duhej. Estonia tha javën e kaluar se Moska kishte dërguar një avion luftarak në hapësirën ajrore të NATO-s mbi Detin Baltik gjatë një përpjekjeje estoneze për të ndaluar një cisternë nafte me destinacion Rusinë që mendohet se është pjesë e "flotës hije" që sfidon sanksionet perëndimore ndaj Moskës. Rusia, eksportuesja e dytë më e madhe e naftës në botë pas Arabisë Saudite, më pas ndaloi një cisternë nafte në pronësi greke, në ujërat ruse, pasi ishte larguar nga një port estonez. Ndalimi i anijes, nxiti shqetësime në lidhje me ndërprerjet e mundshme të transportit detar në korridoret e ngarkuara të Detit Baltik që përdoren për transportin e naftës. I pyetur se çfarë mund të bënte Rusia për të mbrojtur interesat e saj të transportit detar në Detin Baltik nga ato që Moska i ka përshkruar si veprime armiqësore nga vendet anëtare të BE-së dhe Britania, zëdhënësi i Kremlinit Dmitry Peskov u tha gazetarëve: "Siç treguan ngjarjet e fundit në lidhje me tentativën e sulmit pirat ndaj njërës prej cisternave, Rusia tregoi se është e aftë të përgjigjet mjaft ashpër". Peskov tha se Rusia ishte e gatshme të përdorte "të gjitha mjetet" në dispozicion të saj në të ardhmen për t'iu përgjigjur incidenteve të tilla brenda kuadrit të së drejtës ndërkombëtare dhe kishte një gamë të gjerë opsionesh për të zgjedhur. Një zëdhënëse e Ministrisë së Jashtme të Rusisë akuzoi të martën NATO-n për kryerjen e atyre që i quajti veprime agresive në Detin Baltik, që cënuan lirinë e transportit detar pasi Estonia u përpoq dhe dështoi të ndalonte cisternën e drejtuar për në Rusi.