Kosova është e ekspozuar ndaj dezinformatave dhe narrativave që vijnë nga Rusia dhe Kina e që synojnë të nxisin luftë ndëretnike dhe ndërfetare në vend, të kriminalizojnë NATO-n dhe të ulin besimin e shoqërisë në integrimin euroatlantik, si dhe të prezantojnë SHBA-në si shembull të keq. Këto ishin përfundimet kryesore të raportit “Vorbulla e rrenave” lidhur me dezinformimin, që është hartuar nga Rrjeti Ballkanik i Gazetarisë Hulumtuese (BIRN), i mbështetur nga Bashkimi Evropian. Raporti flet për një narrativë e cila synon të kriminalizojë NATO-n, duke e parë këtë si diçka të dëmshme për Kosovën. Gjatë analizës janë identifikuar 44 artikuj si materiale që shpërndajnë propagandën nga jashtë, janë gjetur 14 publikime të cilat pretendojnë të dëmtojnë sigurinë e shtetit të Kosovës, ndërsa hartuesit e raportit thanë se ka pasur qindra materiale të tjera të cilat janë shpërndarë lidhur me ekonominë dhe pandeminë e koronavirusit. Ky raport është publikuar pak kohë pas paralajmërimeve të presidentit ukrainas, Volodymyr Zelensky, se Rusia po synon të nxisë konflikt mes shteteve të Ballkanit Perëndimor. BE-ja e ka mbështetur këtë shqetësim të Ukrainës, ndërkaq nga Departamenti amerikan i Shtetit është thënë se ndikimi malinj rus në rajonin e Ballkanit Perëndimor pengon rrugën e shteteve drejt integrimeve euroatlantike. DASH u shpreh se pikërisht ky ndikim tregon urgjencën e punës që po bën Uashingtoni për të luftuar ndikimin rus. Për synimin e Rusisë që të nxisë konflikte në rajon ka folur edhe kryeministri i Kosovës, Albin Kurti, sipas të cilit, Moska dëshiron të ndezë “një vatër krize në oborrin e Bashkimit Evropian” me qëllim që “të shpërqendrojë NATO-n”.