Një zyrtar i lartë i Bashkimit Evropian i kërkoi Rusisë të rinovojë marrëveshjen që i hap rrugën eksportit të grurit ukrainas përmes porteve të Detit të Zi, pasi Rusia u largua nga marrëveshja muajin e kaluar. Zëvendëspresidenti i Komisionit Evropian, Valdis Dombrovskis tha se kufizimet ruse për transportin e drithërave të Ukrainës nëpërmjet Detit të Zi po krijonin probleme jo vetëm për Kievin, por edhe për shumë vende në zhvillim. Rusia po përdor grurin si armë, tha Dombrovskis, i cili ndodhet në Indi për të marrë pjesë në një takim të ministrave të tregtisë të G20. Turqia është përpjekur të bindë Moskën që t'i kthehet marrëveshjes, e cila u ndërmjetësua nga Ankaraja dhe Kombet e Bashkuara një vit më parë dhe që përfundoi muajin e kaluar. Ministri i Jashtëm rus Sergei Lavrov i tha të enjten Sekretarit të Përgjithshëm të OKB-së Antonio Guterres se Rusia do të kthehet në marrëveshje vetëm nëse Perëndimi përmbush detyrimet e tij ndaj Moskës. Deri më tani, rreth 45 milion ton grurë, fara vaji dhe produkte të lidhura me to janë eksportuar përmes rrugëve alternative nëpërmjet Polonisë dhe Rumanisë. Pamjet: AFP