Qyteza ukrainase e Avdivkas, e përballur me sulme të vazhdueshme ruse, po sheh një zbehje të ofensivës ruse në 24 orët e fundit, për shkak të humbjeve të mëdha të ushtrisë së Rusisë dhe motit të keq po ashu, tha kryebashkiaku i qytezës, Vitaly Barabash. Për gati dy muaj, Rusia ka tentuar të marrë kontrollin e Avdivkas, një qytezë industriale afër Donjeckut, e cila është kthyer në një prej pikave kyçe të luftimit. Ushtarët rusë tani janë në lindje, veri dhe jug të qytezës, e cila është kthyer në gërmadhë. Ukraina ka thënë se ushtria e saj është në kontroll të rajonit dhe po zbraps sulmet atje. “Në 24 orët e fundit, numri i sulmeve tokësore është zvogëluar”, tha Barabash, për një transmetues ukrainas. Ai tha se luftimet janë zbehur për shkak të tre faktorëve; motit të keq, humbjeve të mëdha ruse dhe mungesës së ushtarëve. “Gjithnjë e më pak rusë kanë vullnet që të luftojnë”, shtoi Barabash. Për shkak të luftës së ashpër të zhvilluar për këtë qytet, ukrainasit e konsiderojnë Avdiivkën si simbolin e rezistencës së tyre.