Japonia ka paralajmëruar për përshkallëzim të kërcënimeve mbi sigurinë kombëtare që vijnë nga lufta e rusisë në Ukrainë dhe tensionet e Kinës me Taivanin. Në një përmbledhje vjetore të situatës së sigurisë, të publikuar të premten, japonia bën vlerësimet e saj dhe del në përfundimin se duhen rritur kapacitetet dhe shpenzimet e saj ushtarake. Raporti nxjerr në pah nevojën për forcimin ushtarak të Japonisë me qëllim që të përballohen shqetësimet e shtuara të sigurisë dhe mbledhjen e mbështetjes publike për një ushtri më të fortë dhe buxhet të shtuar që qeveria japoneze synon ta dyfishojë në vitet në vijim. Raporti vjen në muajt para rishikimit të strategjisë kombëtare të sigurisë në japoni dhe pritet që të përfshijë edhe kapacitete sulmuese që kritikët thonë se shkojnë përtej kufizimeve të kushtetutës pacifiste të vendit.