Luftanijet ruse do të vizitojnë Kubën sërish, vetëm disa javë pasi një flotë e vogël që u ankorua në Havana, ngriti shqetësime mbi synimet e Kremlinit në hemisferën perëndimore. Anijet nga Flota ruse e Balltikut mbërrijnë në Havana nga e shtuna dhe mes tyre është edhe anija stërvitore Smolny, fregata Neustrashimy dhe cisterna e naftës Yelnya, tha Ministria e Forcave të Armatosura Revolucionare të Kubës. “Vizita e anijeve nga vende të tjera është një praktikë historike e qeverisë revolucionare me vendet me të cilat ne mbajmë marrëdhënie miqësie dhe bashkëpunimi”, shtoi ministria në postimin në Facebook. Edhe banorët e Havanës do të mund të vizitojnë luftanijet ruse. Vizita e planifikuar, e cila përfundon më 30 korrik, vjen vetëm një muaj pasi një grup anijesh nga Flota Veriore e Rusisë, e udhëhequr nga fregata Admirali Gorshkov dhe nëndetësja bërthamore Kazan, lundroi drejt kryeqytetit kuban përpara stërvitjeve ushtarake në Detin e Karaibeve. Zyrtarët amerikanë thanë se stërvitjet ishin rutinë dhe kishte të ngjarë të ishin në përgjigje të mbështetjes së Uashingtonit për Ukrainën në luftën e nisur nga Vladimir Putin. Megjithatë, anijet kaluan afër Floridës gjatë rrugës për në kryeqytetin kuban, me satelitët që i gjurmonin më pak se 50 km larg Key Largos. Kjo bëri që të ndizeshin spekulimet se bëhej fjalë për një shfaqje të forcës ushtarake të Moskës, në oborrin e Amerikës. Luftanijet amerikane dhe kanadeze u vendosën afër brigjeve të Majamit për të monitoruar anijet ruse. Havana ndodhet vetëm 160 km larg nga Key Ëest, në Florida, ku ndodhet edhe një bazë ajrore amerikane, ndaj vizita të tilla, ndiqen me shumë vëmendje nga shtetet e bashkuara.