Presidenti i Shteteve të Bashkuara, Joe Biden, mori gjithë vëmendjen javën e kaluar, kur tha se presidenti rus, Vladimir Putin, “nuk tallet” kur kërcënon me përdorimin e armëve të shkatërrimit në masë. Ditë më parë, edhe senatori republikan, Marco Rubio, anëtar i Komitetit të Inteligjencës në SHBA, tha se ka frikë se Rusia mund të kryejë një sulm konvencional kundër një vendi anëtar të NATO-s. Kjo, sipas tij, për të penguar ndihmën ushtarake të aleancës për Ukrainën, e cila po lufton forcat pushtuese ruse. Analistët, megjithatë, thonë se Putin ka më shumë gjasa të përdorë mjete të tjera, në përpjekje për të frikësuar Perëndimin. Në këtë aspekt, ata përmendin sulmet e mundshme kundër tubacioneve të gazit, kabllove të nënujshme të të dhënave dhe internetit, por edhe satelitëve që rrotullohen rreth Tokës. “Të gjitha këto metoda sulmesh do të ishin më logjike për Rusinë” sesa një sulm i drejtpërdrejtë ushtarak kundër objekteve të NATO-s, ose përdorimi i armëve bërthamore, thotë Shon Monagan, analist në Qendrën për Studime Strategjike dhe Ndërkombëtare në Uashington. Sulmi i mundshëm rus në një vend anëtar të NATO-s, sipas tij, do të nxiste reagimin e aleancës 30-anëtarëshe. “Lufta me Ukrainën nuk është ekzistenciale. Lufta me NATO-n do të ishte e tillë”, thotë ai.