Në muajin Prill 2021 numërohen 104 aksidente rrugore nga 51 aksidente të ndodhura në të njëjtën periudhë të vitit të kaluar, duke u rritur në mënyrë të ndjeshme, sipas përllogaritjeve të INSTAT. Për shkak të mbylljes vitin e kaluar, rënia e aksidenteve ishte e madhe. Kështu që krahasimi me këtë vit jo normal për shkak të pandemisë ka sjellë një rritje të lartë gjatë këtij muaji. Në katërmujorin e parë të vitit 2021, numërohen 427 aksidente rrugore nga 315 aksidente të ndodhura në katërmujorin e parë të vitit të kaluar, duke u krahasuar me të njëjtën periudhë të një viti më parë. Në muajin Prill 2021, numri i të aksidentuarve (të vrarë dhe të plagosur) është 145 persona nga 67 që ishte një vit më parë, duke u rritur me më shumë se dyfish. Ndërsa në 4 muajt e parë të këtij viti numri i të aksidentuarve është 563 persona. Në muajin Prill të vitit 2021, numri i viktimave nga aksidentet rrugore është 12 persona nga 10 për të njëjtin afat të një viti më parë. Në katërmujorin e parë të këtij viti, numri i të vdekurve nga aksidentet rrugore është 70 persona nga 49 persona të vdekur në të njëjtën periudhë të një viti më parë. Në muajin Prill 2021, aksidentet rrugore në 82,7 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25–34 vjeç, duke zënë 24,0 % të numrit të aksidenteve gjithsej. Gjatë kësaj periudhe, numri i aksidenteve sipas sjelljes së këmbësorit është rritur krahasuar me një vit më parë.