Rritje e frikshme e rasteve me koronavirus është raportuar nga Ministria e Shëndetësisë në 24 orët e fundit. 800 raste të reja, një rritje e ndjeshme në krahasim me një ditë më parë. Sic bëhet e ditur nga autoritetet në 24 orët e fundit janë kryer 5018 testime, nga ku rezultoi se Tirana kryesonte me 160 të infektuar, 134 në Shkodër, 53 në Durrës, 44 në Vlorë, dhe më pak në qytetet e tjera. Aktualisht në total janë 6433 pacientë aktivë me COVID19 në të gjithë vendin, ndërsa në spitalin Infektiv po marrin trajtim 90 pacientë. Ndërkohë me gjithë përpjekjet e mjekëve, në 24 orët e fundit kanë ndërruar jetë dy qytetarë: një qytetar 62 vjeç nga Lezha dhe një qytetar 72 vjeç nga Saranda. Ministria e Shëndetësisë i bën apel qytetarëve të vaksinohen sa më parë, për të mbrojtur veten dhe njerëzit e afërt dhe për të frenuar përhapjen e virusit të rrezikshëm. Muaji Gusht është muaj i hapur i vaksinimit antiCOVID për çdo qytetar +18 vjeç. Vaksinat antiCOVID reduktojnë mundësinë e infektimit dhe shmangin në shkallë të lartë hospitalizimet dhe fatalitetet.