Grupi qytetar “Asnjë Cent Më Shumë” ka njoftuar se do të dorëzojë padi këtë të premte, kundër Zyrës së Rregullatorit për Energji (ZRRE) në lidhje me vendimin për rritjen e tarifave të energjisë elektrike. Padia mësohet se do të dorëzohet në Gjykatën Themelore në Prishtinë – Pallati i Drejtësisë. Qytetarët e Kosovës do të paguajnë 16.1% më shumë për energjinë elektrike nga data 1 maj, pasi ZRRE vendosi ngritjen e cmimit më 16 prill, pavarësisht reagimeve dhe protestave të qytetarëve. Sipas vendimit, shtrenjtimi i energjisë elektrike nuk do të zbatohet në katër komunat veriore serbe, pasi furnizimi dhe faturimi bëhet nga kompania serbe Elektrosever, e licencuar në vitin 2022 në kuadër të dialogut Kosovë-Serbi.