Rusia ka kryer një sulm të madh me dronë mbi Harkiv, në Ukrainë, ndërsa i dërguari i posaçëm i Donald Trumpit, Keith Kellogg, tha se presidenti amerikan po “zemërohet” gjithnjë e më shumë me homologun e tij rus, Vladimir Putin, lidhur me vonesën në arritjen e një armëpushimi, që do të ndihmonte në dhënien fund të konfliktit më vdekjeprurës në Evropë që nga Lufta e Dytë Botërore. Oleh Syniehubov, kreu i rajonit të Harkivit, që gjendet në kufi me Rusinë, tha përmes një postimi në Telegram se të paktën tetë persona janë plagosur, përfshirë dy fëmijë, nga sulmi që ndodhi mëngjesin e të premtes. Kryetari i këtij rajoni, Ihor Terekhov, tha se sulmi shënjestroi “një ndërmarrje komunale”, duke mos dhënë më shumë detaje. Më pas, Presidenti ukrainas Volodymyr Zelensky postoi imazhe të autobusëve të djegur pas sulmit, duke e quajtur atë "një sulm tipik rus ndaj jetës së zakonshme". Ai tha se të paktën tetë dronë Shahed goditën vendin, duke dëmtuar edhe ndërtesat e banimit aty pranë. "Shahedë rusë kundër autobusëve të zakonshëm", shkroi Zelensky në mediat sociale. "Shumica e këtyre sulmeve synojnë infrastrukturën civile dhe nuk kanë qëllim ushtarak". Në javët e fundit, Rusia ka kryer sulme të vazhdueshme, teksa janë intensifikuar përpjekjet për arritjen e një armëpushimi. Shumica e sulmeve shkatërrimtare janë kryer mbi ndërtesa civile, të cilat Rusia pretendon se nuk i shënjestron, pavarësisht dëshmive të shumta që tregojnë të kundërtën. “Zemërimi i Trumpit është se ai ka paraqitur disa propozime të arsyeshme dhe ka bërë diskutime të arsyeshme dhe ai sheh një nivel të paarsyeshmërisë nga Putini që vërtetë e acaron atë”, tha i dërguari amerikan për ukrainën, Keith Kellogg në një intervistë për ABC Neës.