Forcës së Sigurisë së Kosovës i është bashkangjitur edhe një gjeneratë e ushtarëve të rinj. 325 pjesëtarë të rinj të kësaj force kanë bërë betimin për shërbim në këtë institucion, numri më i lartë ky i të diplomuarve ndonjëherë, në ushtri. Të pranishëm në ceremoni, ishin edhe presidentja e Kosovës, Vjosa Osmani dhe kryeministri Albin Kurti. Osmani: Jam krenare që sot ju mbani uniformën e Forcave tona “Ndjehem jashtëzakonisht e lumtur që sot në këtë ceremoni të veçantë ndajmë së bashku emocionet e festës dhe të kurorëzimit të suksesit të madh të 325 djemve e vajzave tona të gjeneratës 2023 të FSK-së. Të dashur ushtar të rinj të kësaj gjenerate, jam krenare që sot ju mbani uniformën e Forcave tona, jam krenare që jeni trashëgimtarë të UÇK-së dhe jam krenare veçanërisht me hapin e parë që hodhët në pragun e komandës së doktrinës dhe stërvitjes duke prekur ëndrrën tuaj për t’u bërë ushtar e ushtare të FSK-së e duke filluar rrugëtimin tuaj me plot sfida në mbrojtje të atdheut tonë të dashur, Republikës së Kosovës.