Ministria e Mbrojtjes e Rusisë tha të mërkurën se ka rrëzuar tre dronë ukrainas në jugperëndim të Moskës, kryeqytetin rus që po përballet me një varg sulmesh ajrore së fundmi. Ukraina sulmoi në orën 05:00, duke i përdorur “tri mjete ajrore pa pilot ndaj objekteve në rajonin Kaluga”, tha Ministria ruse në Telegram. “Të gjithë dronët u pikasën dhe u shkatërruan në kohë nga sistemet mbrojtëse ajrore të Rusisë”, tha Ministria e mbrojtjes. Guvernatori i Kalugas, Vladislav Shpasha, tha se dronët u rrëzuan në jug të rajonit, qindra kilometra larg jugperëndimit të Moskës. “Nuk ka pasoja në njerëz dhe infrastrukturë”, tha Shapsha. Ky sulm ajror është të paktën i pesti këtë muaj mbi rajonin Kaluga, të cilat Rusia thotë t’i ketë parandaluar. Zyrtarët rusë kanë thënë më herët se kishin interceptuar sulmet me dronë në këtë rajon më 3, 7, 10 dhe 12 gusht. Deri në këto sulme të muajit të fundit, kryeqyteti rus dhe rrethinat e tij ishin kursyer nga lufta. Javën e kaluar, dy sulme me dronë u regjistruan në qarkun financiar të Moskës, njëri prej të cilëve shkaktoi dëme të vogla në një ndërtesë të lartë biznesi. Në maj, disa dronë u rrëzuan mbi Kremlin. Ndërkohë, muajin e kaluar, presidenti ukrainas, Volodimir Zelenski, paralajmëroi se lufta po mbërrinte në Rusi.