Me 3 vota pro e 2 kundër, Komisioni Rregullator pranë KQZ, miratoi rezultatin dhe listat finale të zgjedhjeve të 11 majit. Dy përfaqësuesit t opozitës në këtë komision që u rreshtuan kundër, e akuzuan Komisionerin Celibashi për mosmarrjen e masave për mbarëvajtjen e zgjedhjeve dhe parandalimit të manipulimit të tyre, si dhe për dy standarde në shpërndarjen e mandateve. Ky akt shënon mbylljen zyrtare të procesit zgjedhor dhe hap rrugën për konstituimin e Kuvendit të ri. Pas shpalljes së rezultatit, hapi i radhës do të jetë mbledhja e parë e Kuvendit, ku pritet të zhvillohet seanca e konstituimit. Sipas shpërndarjes së mandateve, Partia Socialiste ka siguruar 83 deputetë, Partia Demokratike – Aleanca për Shqipërinë Madhështore 50 deputetë, Partia Socialdemokrate tre mandate, Partia Mundësia dy mandate, Lëvizja Bashkë dhe Nisma Shqipëria Bëhet nga një mandat secila.