Rrebeshe të shumta e të forta janë regjistruar pasditen e së shtunës në Kosovë, duke shkaktuar një sërë problematikash. Rrugë të përmbytura, pemë të thyera e çati të rrëzuar që kanë dëmtuar disa automjete, janë pamjet që të ofrojnë disa komuna të Kosovës këtë të shtunë, si pasojë e motit të keq. Sipas Institutit Metereologjik në Kosovë, moti në këtë fundjavë do të jetë i paqëndrueshëm dhe situata të ngjashme me pasditen e së shtunës mund të regjistrohen gjatë të gjithë fundjavës. Shiu, erërat e forta dhe rrufeja përveç që kanë shkaktuar dëme në rrjetin elektroenergjetik në kryeqytet, kanë shkaktuar edhe dëme të tjera. Në rrugën “Agim Ramadani”, është rrëzuar një lis, derisa një pjesë e kësaj rrugë është me ujë dhe ka vështirësuar qarkullimin e automjeteve. Në lagjen “Bregu i diellit”, një erërat kanë hequr një kulm të një ndërtese, e cila ka rënë duke dëmtuar disa automjete të parkuara, por fatmirësisht nuk ka persona të lënduar. “Reshjet më intensive parashihen ditën e diel, ku do të ketë edhe shkarkime rrufesh, por edhe dita e shtune parashihet të ketë reshje në shumë zona.”, ka informuar IHMK. Temperaturat minimale gjatë këtyre dy ditëve do të lëvizin ndërmjet 12-16 gradë Celsius, ndërsa maksimalet e ditës parashihen të lëvizin ndërmjet 21-28 gradë Celsius. Ndërkohë, do të fryjë erë kryesisht nga veriperendimi, e cila do të jetë e lehtë dhe lokalisht e fortë.