Ish aleatët në qeverinë e Maqedonisë së Veriut, LSDM dhe BDI, tashmë në opozitë janë përplasur ashpër. Shkak është bërë një deklaratë e kreut të partisë më të madhe opozitare të maqedonasve, Venko Filipçe. Ai tha të enjten se LSDM nuk do të bashkëpunojë me Bashkimin Demokratik për Integrim, kur u pyet për mundësinë e një koalicioni opozitar kundër VMRO-së në pushtet. Sipas Filipçes, bashkëpunimi me BDI-në përçan vendin dhe nuk e bashkon atë. Jo vetëm kaq, por kreu i LSDM-së shtoi se BDI është simbol i korrupsionit dhe po nxit tensione etnike me retorikën, që e konsideroi të rrezikshme. “Politikat e tilla nuk kanë vend në shoqërinë tonë multietnike”, tha ai. Pas kësaj deklarate ka reaguar BDI. Përmes një deklarate zyrtare, partia më e madhe e shqiptarëve në Maqedoninë e Veriut akuzon LSDM-në se po ndjek rrugën e VMRO-së duke shfrytëzuar për kapital politik valën e albanofobisë që është ringjallur në Shkup.