Komisioni Qendror i Zgjedhjeve hodhi këtë të hënë shortin për të gjitha subjektet e koalicionet që do të jenë në fletën e votimit. Kësisoj, fleta e votimit do të ketë në përbërjen e saj 11 subjekte apo koalicione, teksa e para sipas shortit do të jetë Partia Demokratike me koalicionin PD- Aleanca për Shqipërinë Madhështore. Po ashtu në bazë të shortit, e dyta në radhë do të jetë Lëvizja Bashkë e pedagogut Arlind Qori, teksa e treta është Lëvizja Atdheu e Kreshnik Osmanit. Koalicioni Euroatlantik i Lulzim Bashës, do të ketë numrin 4 në fletën e votimit, teksa Partisë Socialiste goglat i rezervuan numrin 5. Fill pas PS, në fletën e votimit do të jetë koalicioni Nisma Shqipëria Bëhet me numrin 6 e cila ndiqet nga Aleanca Kombëtare Shqiptare e Elena Kocaqit, që do mbajë numrin 7. Aleanca Demokracia e Re do të mbajë numrin 8 në fletën e votimit, teksa fati i ka rezervuar koalicionit Djathtas për Zhvillim të Enkelejd Alibeajt e Dashamir SHehit numrin 9, të cilin në zgjedhjet e 2021 e mbante PD. Partia Mundësia më pas do të ketë numrin 10, teksa në fund renditet Partia Social Demokrate me numrin 11. 1- Koalicioni PD -Aleanca për Shqipërinë Madhështore 2- Lëvizja Bashkë 3- Lëvizja Atdheu 4- Koalicioni Euroatlantik 5- Partia Socialiste 6- Koalicioni Nisma Shqipëria Bëhet 7- Aleanca Kombëtare Shqiptare 8- Aleanca Demokracia e Re 9- Koalicioni Djathtas për Zhvillim 10- Partia Mundësia 11- PSD