Kryesocialisti Edi Rama e zhvendosi fushatën në veri-lindje të vendit, pas turit elektoral dyditor në Qarkun e Korçës. Rama u ndal këtë herë në Qarkun e Dibrës. Takimet i nisi nga Bashkia e Matit, ku kërkoi rikonfirmimin e Agron Malajt. Kryesocialisti tha se vota për kandidatin e Berishës nuk është votë për të djathtën. Historia e asaj të djathte, historia e atyre gjyshërve dhe stërgjyshërve që për shkak të komunizmit vuajtën aq shumë, është historia e një miqësie të panegociueshme me SHBA, është historia e një lidhjeje të panegociueshme me Perëndimin dhe nuk ka ofendim më të madh për kujtimin e tyre sesa të shkohet t’i jepet vota një force, e cila është kthyer në pengun e një njeriu të vetëm, në pengun e një njeriu të vetëm për hallet personale me drejtësinë dhe me historinë e një njeriu të vetëm, të cilit i është dhënë besim si askujt tjetër nga mbështetësit e asaj partie dhe i cili i turpëroi të gjithë dhe tani kërkon të turpërojë dhe Shqipërinë. Kjo është e pakonceptueshme.