Kryeministri Edi Rama i është drejtuar me një fjalim edicionit të dytë të Samitit të Demokracisë, i cili organizohet nga presidenti i Shteteve të Bashkuara të Amerikës, Joe Biden. Në fjalën e tij, Rama tha se në një kohë kur Rusia ka pushtuar Ukrainën, mbledhja e demokracive në një tryezë merr më shumë kuptim, sa i përket urgjencës dhe rëndësisë së tij. Duke sjellë në vëmendje se edhe Shqipëria ka qenë një vend dictatorial përreth 50 vite, Rama theksoi vullnetin e treguar nga vendi për të ndërtuar një shtet të ri, që bazohet në institucionet demokratike. “Shqipëria ka ecur me këmbëngulje në rrugëtimin e saj sfidues pikërisht drejt këtij destinacioni të ri në historinë tonë. Ne kurrë nuk do të mundemi të falënderojmë mjaftueshëm modelet tona dhe aleatët tanë strategjikë, ShBA-në dhe BE-në, që na frymëzojnë në këtë rrugë të re, plot kthesa”, tha Rama.