Me dhurrata në duar dhe buzëqeshje në fytyrë kryeministri Edi Rama iu drejtua bregdetit të Durrësit për të takuar 121 afganët e ardhur mëngjesin e së shtunës në vendin tonë të cilët u strehuar në një hotel. Kreu i qeverisë shpërndau dhurata për të gjithë fëmijët dhe i uroi mirëseardhjen të larguarve nga aeroporti i Kabulit pas marrjes nën kontroll të Afganistanit nga Talebanët. Të pranishmit i shprehën mirënjohjen kryeministrit shqiptar ndërsa njëri prej fëmijëve festonte edhe ditëlindjen e tij për herë të parë në vendin tonë. Mes batutash, kryeministri u tha se tani do duhet të fillojnë të mësojnë edhe shqip, çka nuk përjashtohet pasi ai ishte i shoqëruar nga zv ministrja e arsimit Bora Muzhaqi. Ende nuk ka një vendim për fëmijët afganë nëse do të fillojnë shkollën duke u integruar në shoqëri apo do të përgatiten hapësira të posaçme studimi për ta pasi edhe duke iu referuar vendimit të qeverisë, do të qëndrojnë në Shqipëri për vetëm një vit. Pas shumë ditësh pritje, afganët e parë erdhën mëngjesin e kësaj të premteje në aeroportin Nënë Tereza ndërsa kryeministri Rama ka folur për 4000 shtetas të rrezikuar nga Talebanët që do të strehohen në vend.