Partia Demokratike thotë se Kryeministri Edi Rama dhe zëvendësja e tij, Belinda Balluku po kërkojnë kohë për të gjetur një rrugëzgjidhje nga akuzat e ngritura nga drejtësia për korrupsion. Përmes zëdhënëses, Floriana Garo, PD thotë se edhe Rama është i përfshirë në korrupsion te tenderat për të cilët akuzohet Balluku. Kundërshtimi i Ramës për të shkarkuar Belinda Ballukun, duke u fshehur pas spërdredhjeve të jurisprudencës, thotë PD, nuk është gjë tjetër veçse përçartje për të fshehur një të vërtetë që tashmë është e qartë si drita e diellit: "urdhëruesi për vjedhjen e 50 milionë eurove në Tunelin e Llogarasë ka një emër, dhe ai është Edi Rama. Ky individ është përgjegjës direkt edhe për vjedhjen me termocentralet e Vlorës Tigri 1 dhe Tigri 3, Unazën e Madhe, koncesionet prej qindra milionë eurosh të rrugëve dhe për çdo akuzë tjetër me të cilën po përballet ekzekutuesi, por jo urdhëruesi", deklaron selia blu. Partia Demokratike e akuzon Edi Ramën si njeriun që, me veprimet e tij, sipas opozitës po përpiqet të pengojë zbardhjen e të vërtetës për një vepër penale në të cilën është në rolin e organizatorit dhe urdhëruesit.