Dy personazhe të njohur në Shqipëri, njëri politikan dhe tjetri pronar mediash janë shpallur non grata nga Shtetet e Bashkuara të Amerikës. Bashkë me ta, me të njëjtën kategori janë ndëshkuar edhe 7 zyrtarë të tjerë nga Ballkani Perëndimor. Departamenti i Thesarit thotë se krimi i organizuar mbetet një kërcënim në Shqipëri dhe aktorët kriminalë kanë ndikim në politikën shqiptare. Në deklaratën për shtyp, shtetet e Bashkuara të Amerikës e cilësojnë Aqif Rakipi si një ish-deputet famëkeq nga Elbasani, i cili ka një ndikim të dëmshëm dhe destabilizues në proceset politike në Shqipëri. “Grupe të shumta të krimit të organizuar në Shqipëri kanë ofruar para, dhurata ose premtime për vende pune ose koncesione në këmbim të votave për partinë e tyre të preferuar politike. Rakipi ka qenë prej kohësh i përfshirë në krimin e organizuar dhe është i lidhur ngushtë me një organizatë kriminale brenda së cilës ai ka ushtruar ndikim politik, duke përfshirë edhe korrupsionin. Për shembull, Rakipi ka përdorur ndikimin e tij politik për të emëruar miqtë e tij në postet kryesore publike në Elbasan dhe Tiranë.” Departamenti i Thesarit, kujton se Rakipi humbi mandatin e tij si deputet i Parlamentit të Shqipërisë, pasi prokurorët konfirmuan rolin e tij në veprimtari kriminale. Por, në deklaratën e gjatë të Departamentit të Thesarit është shkruar edhe për Ylli Ndroqim, pasuritë e të cilit janë sekuestruar nga qeveria shqiptare në vitet 2020 dhe 2021. Departamenti i Thesarit thotë se Ndroqi ka shfrytëzuar mediat nën kontrollin e tij për të zhvatur dhe shantazhuar qytetarët shqiptarë në këmbim të ndalimit të publikimit të historive negative në media