38 pasagjerë u vranë të mërkurën pasi Fluturimi 8432 i Azerbajxhani Airlines u rrëzua teksa tentoi të bënte një ulje emergjente pranë qytetit Aktau në Kazakistan. Burimet e qeverisë së Azerbajxhanit kanë konfirmuar për Euroneës të enjten se një raketë ruse tokë-ajër shkaktoi rrëzimin e avionit të Azerbajxhani Airlines në Aktau të mërkurën. Sipas burimeve, raketa u lëshua drejt avionit me pasagjerë gjatë një aktiviteti ajror me dronë mbi Grozny dhe shpërtheu pranë avionit në mes të fluturimit. Burime qeveritare kanë thënë se avioni i dëmtuar nuk u lejua të ulej në asnjë aeroport rus, pavarësisht kërkesave të pilotëve për një ulje emergjence, dhe avioni u urdhërua të fluturonte përtej Detit Kaspik drejt Aktau-t në Kazakistan. Sipas të dhënave, sistemet e navigimit GPS të avionit u bllokuan gjatë gjithë fluturimit mbi det. Një pasagjer i mbijetuar i tha televizionit rus se besonte se piloti kishte tentuar dy herë të ulej në mjegull të dendur mbi Grozny përpara se "herën e tretë, të dëgjohej një shpërthim...”.