Me rezultatet e reformës në drejtësi, kryetari i Partisë Socialiste, Edi Rama kërkoi një mandat të katërt qeverisës, që sipas tij, pas shembjes së pallatit të pandëshkueshmërisë; tashmë synon integrimin e plotë të Shqipërisë në Bashkimin Europian brenda vitit 2030. “Jam përpara jush për t’ju thënë se pranverën e ardhshme dua votë tuaj nga amerika për ta bërë shqipërinë 2030 anëtare të BE. Për ta ngritur bashkë me ju flamurin e skënderbeut dhe ismail qemalit, krah gjithë flamujve të tjerë të familjes së madhe europiane të cilët i kemi përkitur historikisht.” Hetimet e drejtësisë së re, majtas dhe djathtas, u cilësuan nga Rama si fundi i pandëshkueshmërisë, në një moment kur pjesë e dosjeve të SPAK kanë qenë ish kryeministri, Sali Berisha, ish presidenti Ilir Meta apo edhe ish zëvendëskryeministri socialist, Arben Ahmetaj. Suksesin e reformës në drejtësi, Rama ja faturon totalisht Partisë Socialiste. “ Amerika atje ishte dhe para ardhjes sonë në pushtet. Amerika është dhe në vende të tjera të rajonit, si ka mundësi që nuk e solli më parë amerika këtë peshqesh të madh për shqiptarët? Njerëz të lidhur me pushtetin politik i janë nënshtruar ligjit të barabartë për të gjithë. Kurrë më parë në historinë tonë, një individ me profil të lartë politik, nuk është kontrolluar nga një gjykatë e pakontrolluar nga politika. Askush nuk është më i paprekshëm, cilido që kërkohet nga drejtësia nuk merr asnjë lloj mbrojtje nga ne, kjo është shprehja më shembullore ndaj zgjedhësve që na votuan tre herë resht dhe do na votojnë sërish.” Për shkak të kontributit të remitancave në ekonominë shqiptare, emigrantët e pranishëm kërkuan vendin e tyre në parlament. Rama u shpreh se në listën e deputetëve të Partisë Socialiste do të ketë edhe përfaqësues të diasporës.