Dëmshpërblimet për familjarët e viktimave të shpërthimit në fabrikën e demontimit të armëve në Gërdec do të paguhen nga fondi rezervë i buxhetit të shtetit për vitin 2024. Në mbledhjen e qeverisë u vendos fillimi i ekzekutimit të vendimit të Gjykatës së Strasburgut, ku u konstatua se procedurat e përdorura në objektin e Gërdecit kanë qenë të pasigurta dhe jo në përputhje me standardet normale të punës në fabrikat që kanë të bëjnë me eksploziv dhe armë. Strasburgu vendosi një dëmshpërblim prej 12 mijë eurosh nga shteti shqiptar për Zamira dhe Feruzan Durdaj, që humbën djalin e tyre shtatë vjeçar në tragjedinë e Gërdecit, për 15 personat e tjerë që iu drejtuan Strasburgut për çështjen e Gërdecit, dëmshpërblimi është 10 mijë euro teksa shteti shqiptar ka detyrimin të paguajë edhe 8 mijë euro bashkërisht për të gjithë aplikatët për kostot dhe shpenzimet.