Shtatori i vitit të kaluar, shënoi nisjen e një sezoni politik të nxehtë, ku politika ishte në kulmin e agresivitetit të saj. Nga njëra anë maxhoranca, e nga ana tjetër opozita me shumë problematika, ndërsa shtohej edhe qëndrimi radikal i ish-presidentit Ilir Meta. Gjithsesi pas muajve me zhvillime të shumta politike, erdhi koha e heshtjes. Qeveria këtë të premte uli siparin e një viti me shumë ulje-ngritje, duke qenë tashmë në sezonin e pushimeve për të rimarrë energjitë e vjeshtës, që ashtu si duket deri tani pritet të jetë edhe më e ngarkuar politikisht. Institucionet qeveritare dhe thuajse e gjithë administrata janë gati për të pushuar dhe vendi më së shumti i dorëzohet qetësisë, aq shumë të kërkuar gjatë një viti intensiv. Dhe ky sezon u mbyll me vendimet e fundit qeveritare, para se qeveria Rama 3 të largohet në pushimet verore. Zhvillime politike, protesta , debate, akuza e kunderakuza do të kenë kohën e tyre, kur protagonistët të kthehen nga pushimet për t’u rikthyer në shtatorin e betejeve dhe arenës së debateve parlamentare.