Ministri për Evropën dhe Punët e Jashtme, Igli Hasani ka takuar në Hagë, ish-presidentin e Kosovës, Hashim Thaçi. Pas takimit Hasani shprehet se ish-presidenti i Kosovës ishte optimist dhe me besim të palëkundur që e drejta do të triumfojë, ndërsa dha detaje nga takimi mes tyre. Sinkron Hasani: “Ishte vërtet mbresëlënëse kurajo e tij, ekuilibri i brendshëm, qetësia e kthjelltësia e vizionit që ka për të ardhmen. I vetëdijshëm se proceset gjyqësore janë një maratonë me të përpjeta e tatëpjeta. Garën e fiton ai që është i përgatitur psikologjikisht. I përcolla zotit Thaçi urimet më të mira të drejtuesve më të lartë të qeverisë dhe të shtetit, të Kryeministrit Edi Rama dhe kolegëve të tjerë, si dhe sigurinë që, ashtu si më parë, mbështetja jonë nuk do t’i mungojë në asnjë rast dhe për asgjë.”