Për të tretën herë ligjvënësit do të votojnë për dërgimin apo jo të mandatit të deputetes socialiste, Olta Xhaçka në Gjykatën Kushtetuese. Votat e kolegëve të saj socialistë janë përcaktuese. Në dy votimet e mëparshme janë bërë shkak për mos shqyrtimin nga trupa gjykuese të pretendimeve për papajtueshmëri në ushtrimin e funksionit, për shkak të dhënies së statusit të investitorit strategjik, bashkëshortit të saj Artan Gaçi, në kohën kur Xhaçka ishte pjesë e kabinetit qeveritar. Seancës së 12 shtatorit, i paraprinë dy raporte të shumicës dhe pakicës parlamentare, ku ndër rreshta duket se socialistët kanë bërë një hap pas, megjithëse Peleshi u shpreh se nuk kanë qëndrim politik për këtë çështje, dhe deputetët do të lihen të lirë të votojnë. Në raportin e Partisë Socialiste nënvizohet fakti se vendimet e Gjykatës Kushtetuese janë përfundimtare dhe të detyrueshme për zbatim.