Ish-kryetarja e Komisionit Qendror të Zgjedhjeve në Kosovë, Valdete Daka, thotë se, pavarësisht numrit të vogël të votuesve në veri të Kosovës, kryetarët e komunave atje do të zgjidhen, nëse procesi është i rregullt. “Përsëritje të zgjedhjeve nuk do të ketë, veçse nëse dëmtohet procesi, atëherë po. Por, në rrethana të rregullta, në rrethana kur qytetarët dalin e votojnë dhe kryejnë detyrën e tyre, mbyllen vendvotimet, numërohen votat... Përsëritje nuk do të ketë”, thotë Daka. Korrespondentët që po ndjekin procesin në terren raportojnë për numër të vogël votuesish në komunat veriore me shumicë serbe - Mitrovicë e Veriut, Zveçan, Zubin Potok dhe Leposaviq. Partia më e madhe e serbëve të Kosovës, Lista Serbe, e cila vetë nuk merr pjesë në zgjedhje, ka bërë thirrje për bojkotimin e procesit. Në këtë qëndrim, ajo ka pasur edhe mbështetjen e Beogradit zyrtar.