Më 14 tetor, një inxhinier rus i quajtur Gleb Karakulov hipi në një avion pasagjerësh për të udhëtuar nga Kazakistani drejt Turqisë së bashku me bashkëshorten dhe vajzën e tij. Ai fiku telefonin dhe i tha lamtumirë jetës së tij në Rusi. Por, ky nuk ishte thjesht një rus i zakonshëm që po largohej nga vendi. Karakulov ishte oficer në shërbimin elitë të sigurisë personale të Presidentit Putin. Ai është një ndër rusët e paktë që largohen dhe flasin publikisht, dhe që për shkak të gradës që mbante kishte edhe njohuri për jetën e Putinit apo edhe akses në informacione të klasifikuara. Karakulov, mbulonte sektorin e komunikimeve të sigurta dhe thotë se kundërshtitë morale ndaj sulmit të Rusisë në Ukrainë dhe frika se mund të gjente vdekjen atje, e shtynë që të fliste publikisht, megjithë rrezikun për atë vetë apo për familjen e tij.