Të paktën gjashtë persona janë vrarë dhe mbi 50 të tjerë janë plagosur si pasojë e sulmeve ruse me dronë dhe raketa në Ukrainë në orët e hershme të mëngjesit, thanë zyrtarët ukrainas. Në mesin e të vrarëve është edhe një gjashtëvjeçar, ndërsa tre viktima tjera janë konfirmuar në hapësirat e një blloku banesash që është rrëzuar si pasojë e sulmeve. Tymur Tkachenko, shef i administratës ushtarake të Kievit, tha se numri i viktimave mund të rritet, pasi dëme janë shkaktuar në dhjetëra pika në kryeqytetin ukrainas. Sulmet ruse kanë vazhduar pavarësisht kërcënimeve të presidentit amerikan, Donald Trump që të vendosë sanksione më të ashpra ndaj Moskës, nëse lideri rus, Vladimir Putin nuk pajtohet për armëpushim deri më 8 gusht. Kryebashkiaku i Kievit, Vitali Klitschko tha përmes një postimi në Telegram se dritaret e një spitali për fëmijë në rajonin Shefçenski janë thyer tërësisht. Ministri i Jashtëm ukrainas, Andrii Sybiha tha përmes një postimi në X se Kievi është dëshmitar i një “mëngjesi të tmerrshëm” dhe që ende ka njerëz nën rrënoja. Sipas tij, presidenti Trump është treguar “shumë i durueshëm” me Putinin, dhe që tani është koha për “presion maksimal ndaj Moskës” përmes sanksioneve.