Rusia ka kryer këto ditë, një fushatë brutale sulmesh ajrore mbi Ukrainë, duke mos kursyer as kryeqytetin Kiev, ku sirenat e alarmit kanë gjëmuar cdo natë të fundit, për orë të tëra. Analistët thonë se kjo fushatë brutale është pjesë e një strategjie të qëllimshme nga Rusia që është hartuar për të krijuar përshtypjen se ajo ka epërsinë në konflikt, për të minuar moralin e Ukrainës dhe për të ushtruar më shumë presion mbi aleatët perëndimorë të Kievit. Rusia filloi të intensifikojë sulmet ajrore kundër Ukrainës vjeshtën e kaluar, pasi me sukses rriti prodhimin vendas të versionit të saj të dronëve Shahed të prodhuar në Iran, droni i saj më i përdorur. Por frekuenca dhe shkalla e këtyre sulmeve u rritën përsëri në janar, pasi Presidenti i SHBA-së Donald Trump u kthye në Shtëpinë e Bardhë. Pesë nga sulmet më të mëdha me dronë të Rusisë janë kryer që atëherë. Katër nga pesë sulmet më të mëdha të luftës u kryen gjatë 10 ditëve të fundit, sipas një analize të CNN. Trump e ka bërë përfundimin e luftës në Ukrainë një nga prioritetet e tij - pasi tha gjatë fushatës zgjedhore se do ta përfundonte konfliktin brenda 24 orëve nga marrja e detyrës. Por pavarësisht premtimeve, Trump duket se është bërë gjithnjë e më i paduruar me Moskën dhe Kievin. Ai është luhatur mes kërcënimit për të ndëshkuar Rusinë me më shumë sanksione nëse nuk nënshkruan një propozim për armëpushim dhe sugjerimit se mund të largohet plotësisht nga kjo çështje. Gjatë fundjavës, pasi Rusia nisi sulmin e saj më të madh ajror kundër Ukrainës që nga fillimi i luftës, Trump tha në mediat sociale se Putin "është çmendur plotësisht!" para se t'u thoshte gazetarëve se "nuk ishte i kënaqur me atë që po bën Putin". Por Trump gjithashtu kritikoi ashpër Presidentin ukrainas Volodymyr Zelensky për sugjerimin se "heshtja e Amerikës" e inkurajon Putinin të vazhdojë sulmet e tij. Ai tha se Zelensky i bën dëm vendit të tij sepse "çdo gjë që del nga goja e tij shkakton probleme". Analistët në Institutin për Studimin e Luftës, një monitorues konfliktesh me bazë në SHBA, thonë se fushata brutale ajrore e Rusisë është pjesë e strategjisë për të krijuar iluzionin se po fiton luftën, në një "përpjekje për të degraduar moralin e ukrainasve dhe për të bindur Perëndimin se një fitore ruse në Ukrainë është e pashmangshme dhe se mbështetja e Ukrainës është e kotë". Dhe putin e di se e vetmja mënyrë që Rusia mund ta fitojë luftën në një kohë të afërt është nëse aleatët perëndimorë të Ukrainës, Shtetet e Bashkuara e para mes tyre, ndalojnë së mbështeturi Kievin në përpjekjet e tij të luftës.