Presidenti rus Vladimir Putin shpalli të mërkurën ligjin e luftës në katër rajonet e ukrainës të pushtuara nga Rusia që Moska muajin e shkuar i pretendoi si territore të saja. Në disa komente të transmetuara në televizion para anëtarëve të këshillit të Sigurisë, Putin po ashtu i kërkoi qeverisë të krijonte një këshill të posacëm koordinimi nën kryeministrin Mikhail Mishustin, që të punonte me rajonet e rusisë për të rritur përpjekjet e moskës në luftë. Lëvizja që vjen pas thuajse tetë muajsh luftë, shënoi përshkallëzimin më të fundit nga ana e Putin i cili e ka gjetur veten përballë një serie disfatash si pasojë e ofensivës së forcave ukrainase që nga fillimi i shtatorit. Vendimi vjen po ashtu në të njëjtën ditë kur zyrtarët rusë në Herson, një nga katër rajonet e pushtuara, urdhëruan civilët të largoheshin sa më shpejt që të ishte e mundur në pritje të një sulmi ukrainas. E ndërkohë po rritet frika se Putin mund të bëjë edhe një shou force bërthamore në Detin e Zi ndërkohë që pushtimi i tij po dështon. Humbja e Hersonit do të ishte disfata më poshtëruese deri më tani për Putinin e kjo ka ndezur edhe frikën për mënyrën se si ai mund të reagojë.