Vladimir Putin ka shkarkuar një nga gjeneralët më të lartë të tij që ka udhëhequr forcat ruse në ukrainë – thotë inteligjenca britanike. Gjeneral-koloneli Rustam Muradov është shkarkuar si komandant i grupit lindor të forcave ushtarake ruse – tha ministria britanike e mbrojtjes në buletinin më të fundit të saj. Grupi, është bërë i njohur për sulmet e tij të dështuara, përfshirë ato në qytetin lindor të Vuhledarit, që përfundoi me shkatërrimin e dhjetëra tankeve. Forcat e grupit lindor kanë pësuar humbje jashtëzakonisht të rënda për shkak të sulmeve të planifikuara keq dhe dështimeve të përsëritura në përpjekjen për të marrë nën kontroll Vuhledarin – tha ministria britanike. Si rezultat, operacionet kanë ndezur kritika të mëdha publike në të gjithë rusinë, por edhe nga trupat që ishin nën komandën e vetë gjeneralit Muradov.