Presidenti i Serbisë, Aleksandar Vuçiç, tha të dielën se ka biseduar me presidentin e Rusisë, Vladimir Putin, dhe se e ka falënderuar atë që e kishte siguruar se Rusia do t’i japë mjaftueshëm gaz Serbisë këtë dimër. Pushtimi rus i Ukrainës, e zuri serbinë plotësisht të varur nga gazi rus. Duke ndjekur shembullin e shumë vendeve të Bashkimit Evropian edhe Serbia nisi të punonte për gjetjen e burimeve alternative të furnizimit me gaz. Megjithatë, pavarësisht thirrjeve të Bashkimit Evropian, ku serbia synon të antarësohet, Beogradi nuk ka pranuar të vendosë sanksione ndaj Rusisë dhe përfaqësuesit e autoriteteve serbe vazhdojnë të mbajnë lidhje me Kremlinin. Vuçiç njoftoi në profilin e tij në Instagram të dielën se nuk kishte biseduar me Putinin prej gati dy vjetësh e gjysmë dhe se më 20 tetor ata patën një “bisedë të mirë, të hapur, të gjatë dhe kuptimplotë”. “Shpreha vendosmërinë, ashtu si dy vjet e gjysmë më parë, se Serbia nuk do të vendosë sanksione ndaj Federatës Ruse”, tha Vuçiç duke shtuar më pas se me Putinin kishte biseduar edhe për çështje dypalëshe, ekonomike dhe politike. Rusia është mbështetësja më e madhe e Serbisë në kundërshtimin e pavarësisë së Kosovës, të cilën Prishtina e shpalli më 2008. Ndërkohë, biseda mes tyre zhvillohet ndërsa Rusia po pret përgjigje zyrtare nga Serbia për ftesën e Putinit në shtator që Vuçiçi të marrë pjesë në samitin e BRICS në Kazan, i planifikuar të mbahet nga 22 deri më 24 tetor.