Rusia thotë se përdorimi i raketave amerikane me rreze të gjatë veprimi nga Ukraina do të çojë në "një përgjigje të përshtatshme dhe të ngjashme". Një sulm i tillë brenda territorit rus "do të përfaqësonte përfshirjen e drejtpërdrejtë të Shteteve të Bashkuara dhe satelitëve të saj në luftën kundër Rusisë", thuhet në një deklaratë të Ministrisë së Jashtme ruse. Presidenti Joe Biden miratoi përdorimin e raketave amerikane mbi objektiva në Rusi në një ndryshim të madh të politikës së SHBA-së, dy muaj para se ai të largohet nga Shtëpia e Bardhë. Nuk është e qartë nëse pasardhësi i tij, presidenti i sapozgjedhur Donald Trump, është konsultuar, ose nëse ai do t'i përmbahet vendimit, pasi ka premtuar t'i japë fund luftës Rusi-Ukrainë. Ukraina ka pasur raketa ATACMS të SHBA-së me një rreze veprimi prej 300 km, si dhe raketa franceze dhe britanike "Storm Shadoë" të një game të ngjashme, por aleatët perëndimorë e kishin ndaluar Kievin të godiste Rusinë me to. Vendimi i Biden për të hequr këtë kusht është një moment i rëndësishëm në luftën që ka hyrë në ditën e saj të 1000-të të martën. Miratimi i raketave me rreze të gjatë veprimi nga Biden, që mund të pasohet nga autorizime të ngjashme nga Britania e Madhe dhe Franca, po shihet në Perëndim si një mënyrë për t'i sinjalizuar udhëheqësit rus se ai nuk mund ta fitojë luftën në Ukrainë ushtarakisht. Vetë Putin nuk ka bërë ende komente për vendimin e Biden.