Presidenti ukrainas Volodymyr Zelenski akuzoi të martën Rusinë se shënjestroi "qëllimisht" civilët në një sulm në qytetin verilindor të Sumy-t ku mbetën të vrarë tre persona dhe u plagosën të paktën 20 të tjerë. Qyteti është bombarduar intensivisht pasi Presidenti rus Vladimir Putin ka urdhëruar trupat e tij të krijojnë një "zonë tampon" brenda rajonit të Sumy-t, i cili kufizohet me Rusinë. "Rusët nisën një sulm të egër në Sumy duke shënjestruar drejtpërdrejt qytetin dhe rrugët e tij me breshëri raketash. Ishte një sulm plotësisht i qëllimshëm ndaj civilëve", tha Zelenski në një postim në mediat sociale. Ai postoi një video të shërbimeve të emergjencës që tregonte makina të shkatërruara dhe trupin e një viktime të shtrirë në rrugë. Zyrtarët lokalë thanë se Rusia lëshoi pesë raketa MLRS në qytet rreth orës 09:00 të mëngjesit.