Pas incidentit ku mbeti i dëmtuar rëndë një punëtor, Policia e Gjirokastrës ka vënë pranga tre përgjegjësit në Sektorin e Mirëmbajtjes në Drejtorinë e Shërbimeve Komunitare dhe ka shpallur në kërkim Drejtorin e shërbimeve publike në Bashkinë Gjirokastër. 55-vjeçari Tani Kopeci gjatë punës për pastrimin e një objekti të martën ra aksidentalisht nga kati i dytë. Ai është transportuar në Spitalin e Traumës në Tiranë me helikopter pasi ndodhet në gjendje kritike për jetën. Si rrjedhojë, policia ka bërë të mundur arrestimin e 3 përgjegjësve të sektorit Pano Çako, Arben Baxha dhe Adrian Loloçi për ‘shkelje të rregullave të mbrojtjes në punë’, si edhe shpalli në kërkim Drejtorin Adriatik Onjea. Ndaj këtij të fundit rëndon akuza për veprën penale të ‘Shpërdorimit të detyrës’, pasi nuk është paraqitur të jap shpjegime dhe të vërë në dispozicion dokumentacionin e nevojshëm për hetimin e plotë të këtij rasti. Gjithashtu, në lidhje me rastin është njoftuar Inspektortati i Punës, ndërkohë që vijon puna për dokumentimin e plotë të përgjegjësive të cdo personi të përfshirë.