Gjykata e Posaçme ka çmuar se zv.Kryeministrja Belinda Balluku dhe dy vartësit e saj nën akuzë për shkelje të barazisë në tendera rrezikojnë të prishin, provat, të arratisen, ose të kryejnë sërish të njëjtën vepër penale për të cilën dyshohen. Ky ka qenë arsyetimi i dhënë nga gjyqtari Erion Çela për masën e sigurisë pezullim nga detyra dhe ndalim i daljes jashtë vendit për Belinda Ballukun dhe arrest shtëpie për drejtorin e Autoritetit Rrugor Shqiptar, Gentian Gjyli dhe drejtorit të Korporatës Elektroenergjitike Shqiptare, Erald Elezi. Gjykata e Posaçme thotë se rreziku që të kryejnë të njëjtën vepër lidhet me funksionet e tyre dhe fakti që menaxhojnë vazhdimisht fondet publike për investime të parashikuara nga institucionet që drejtojnë. Gjykata vlerëson gjithashtu se ekziston edhe rreziku i arratisjes, nisur nga marzhi i dënimit që parashikon legjislacioni për veprën penale që akuzohen, e kryer në bashkëpunim në të paktën dy raste.