Kryesia e Partisë Socialiste votëbesoi në pjesën dërrmuese të 61 bashkive kryetarët aktualë të tyre, duke i propozuar si kandidatë edhe për në 14 maj. Me përjashtim të Bashkisë së Vlorës, ku dihej që Dritan Leli nuk do të rikandidohej më, në të gjitha bashkitë e tjera të mëdha, socialistët vijuan me emrat që janë aktualisht në detyrë. Në Tiranë Kryesia konfirmoi zyrtarisht Erion Veliajn bashkë me katër kryetarët aktualë të bashkive të tjera të qarkut. U rikonfirmuan gjithashtu edhe emrat e kryetarëve aktualë të bashkive në dy bastionet e Partisë Demokratike, Tropojë e Kukës. Në Kukës, Safet Gjici do të kërkojë të ruajë këtë pozicion, pasi e mori postin pa garë në 2019, ndërsa Rexhë Byberi do të përpiqet të bëjë të njëjtën gjë në Tropojë. Qarku i Vlorës është qarku me më shumë rrotacione, ku nga shtatë kryetarët aktualë vetëm Jorgo Goro në Himarë u rikonfirmua. Emra e të rinj nisin që nga Vlora me Ermal Dredhën e në Sarandë me Olti Çaçën. Në Selenicë Nertil Bellaj, kandidat i propozuar nga Blendi Klosi u zgjodh para emrit të propozuar nga deputeti Vullnet Sinaj. Nga shtatë bashkitë e qarkut të Elbasanit, në katër u konfirmuan kryetarët aktualë, në tre të tjerat emra të rinj. Gledjan Llatja në Elbasan, Andis Salla në Cërrik, Arif Tafani në Belsh dhe Nuri Belba në Përrenjas u rikonfirmuan, ndërsa deputeti Besjan Ajazi u propozua si drejtuesi i ri i Bashkisë së Gramshit dhe Mariglen Disha për Librazhdin.