Për të gjashtën ditë radhazi, qytetarët u mblodhën për të protestuar për vrasjen e Klodian Rashës, nga efektivi i policisë. Mësohet se pak para nisjes së protestës kryeministri Edi Rama është larguar nga Kryeministria. Situata ka vijuar e qetë, ndërsa forcat e rendit kishin marrë masa shtesë, duke kontrolluar shumë persona që ndoshta edhe rastësisht kalonin në rrugët kur protesta zhvillohej. Ashtu si edhe ditët e tjera, protesta ka pasur si organizatë grupe të ndryshme në rrjetet sociale, ndërsa policia gjatë ditës bëri thirrje për të mos marrë pjesë në to, në kuadër të masave anticovid. Policia që ishin vendosur në sheshin Skënderbej bënë verifikimin e të rinjve që hynin në shesh, ndërsa ishte e vendosur për të mos lejuar asnjë grumbullim. Policia ka zbritur në terren një orë më parë se protestuesit, ndërsa kishte marrë edhe mjete të tjera si autoboti me ujë për shpërndarjen e protestuesve, nëse do të kishte akte dhune.