Socialistët nisën të vetëm fazën e dytë të asaj që e konsiderojnë konsolidim të reformës në drejtësi. Opozita bojkotoi punimet parlamentare, teksa bëhet gati për protestën kombëtare të 22 dhjetorit. Xhafaj: “Sot opozita nuk është e pranishme për shkak të një vendimmarrje politike nga ana e tyre, por kjo nuk është arsye për të penguar vazhdimin normal të jetës parlamentare. Mbledhja ka ditë që është njoftuar, është pjesë e kalendarit të punës, do të duhet të vazhdojmë normalisht.” Nismëtari Olsi Komici prezantoi ndryshimet në dy ligje ‘Për statusin e prokurorëve dhe gjyqtarëve dhe organet e qeverisjes së sistemit të drejtësisë. Parashikohet që të ashpërsohen kriteret e integritetit të figurës për anëtarët e KLP-së dhe KLGJ-së që vijnë jashtë sistemit të drejtësisë. Gjatë punimeve, socialistët u ndalën edhe tek një dispozitë kalimtare për drejtimin e gjykatave dhe prokurorive si dhe një propozim që ka mbërritur në kuvend nga unioni i gjyqtarëve.