Ndaj të dyshuarit për përpjekjen për të vrarë ish-Presidentin Donald Trump u ngritën akuza për armëmbajtje në një gjykatë federale të hënën, një ditë pasi u pikas ndërsa fshihej me një armë zjarri në dorë, në shkurret përreth fushës së golfit të ish-presidentit në Florida. Ndërsa duket se do të ketë akuza të mëtejshme në të ardhmen, akuzat fillestare për armëmbajtje ndërsa ishte i dënuar më herët për një tjetër vepër penale, si dhe për zotërim arme me numër serie të fshirë, do t’u mundësojnë autoriteteve që ta mbajnë të dyshuarin nën arrest gjatë kohës që do të vazhdojnë hetimet. Kandidati republikan për president nuk u dëmtua fizikisht. Por, ky incident ngre pikëpyetje të reja se si dyshuari i armatosur arriti t’i afrohet Trumpit, vetëm dy muaj pasi një tjetër person i armatosur hapi zjarr gjatë një tubimi në Butler të Pensilvanisë, duke e plagosur ish-presidentin në veshin e djathtë. Sipas dokumente të paraqitura në gjykatë, të dhënat telefonike tregojnë se i dyshuari mund të ketë qëndruar në pritje për gati 12 orë të shtunën. Shërbimi Sekret hapi zjarr pasi njëri prej agjentëve pikasi grykën e pushkës që dilte nga shkurret të dielën, mbi 300 metra pranë fushës ku ish-presidenti po luante golf.