Qeveritë e Kosovës dhe Maqedonisë së Veriut do të mbajnë një mbledhje të përbashkët këtë të hënë në Prishtinë, ku pritet të nënshkruajnë disa marrëveshje dypalëshe. Sipas zëvendëskryeministrit maqedonas, do të nënshkruhen dy marrëveshje, një për energjinë dhe një në fushën e arsimit, si dhe një protokoll për pikat e përbashkëta kufitare në Bllacë-Hani i Elezit dhe Jazhincë-Glloboçicë. Kosova dhe Maqedonia e Veriut do të pajtohen që në dy pikëkalimet kufitare ta kenë vetëm një pikë kontrolli, për të mundësuar qarkullimin e pandërprerë të qytetarëve dhe për të lehtësuar zhvillimin ekonomik. Sipas zyrtarëve të Maqedonisë së Veriut, takimi shënon një moment të rëndësishëm” për forcimin e marrëdhënieve mes dy vendeve dhe se do të jetë një shembull i bashkëpunimit që afron drejt një rajoni më të zhvilluar dhe të integruar. Para takimit ndërqeveritar, kryeministri i Kosovës, Albin Kurti, priti në një takim dypalësh homologun e tij nga Maqedonia e Veriut, Hristijan Mickoski.