Më pak se dy muaj ndajnë nisjen e procesit për zgjedhjen e Presidentit të ri të Republikës. Por, kjo ka bërë që politika në të dy kahet e saj të mos jetë fort e qartë dhe me qëndrime e vendime të diskutueshme dhe pa fund. Në njërën anë Partia Socialiste ka zgjedhur 3 negociatorët e saj për emrin e ri për Presidencën, përkatësisht Damian Gjiknuri, Elisa Spiropali e Taulant Balla, nga ana tjetër Partia Demokratike vijon të jetë në kaos mendimesh e vendimesh. Ndonëse ka një vendim gjykate që nëpërmjet regjistrimit të Statutit të ri, njeh Kuvendin e 11 dhjetorit dhe të gjitha vendimet e dala prej tij, nga ana tjetër, Kreu i grupit parlamentar të PD e ka ankimuar këtë vendim. Madje Gazment Bardhi ka kallëzuar në SPAK gjyqtarin Zhukri. Por përkundër këtyre qendrimeve, përkrahësit e ish-kryetarit Lulzim Basha, duket se problemin e kanë me Berishën, dhe kërkojnë largimin e tij, për bashkimin e demokratëve. Nga ana tjetër Komisioni i Rithemelimit ka në dorë vendimin e gjykatës dhe votat e demokratëve në referendum, Kuvend dhe zgjedhjet e 6 marsit, e kërkojnë bashkim. Në të tillë situatë pikëpyetja e parë që ngrihet ka të bëjë me faktin se si do caktohen negociatorët nga PD për emrin e ri të Presidentit, nga Komisioni i Rithemelimit, apo përkrahësit e Bashës me në krye Alibeajn? Kjo pikëpyetje pritet të marrë përgjigje deri në 30 prill, datë e cila shënon Kuvendin Kombëtar të PD, nga ku mund të kemi edhe bashkimin e të dy palëve.